Kole Glywic znondziecie niyjedyn stow i niyjedno rzeczka. Kedyś downo miyszkali we nich utopce. Jedna ouma ze kole Zernik padaua ize widziaua, jak jeszcze boua mauo dziouszka, jednego Utopca i miou on zielone ślypia i zielone zymby, blank staro pomarszczono gymba, na gowie miou czerwono kapa. Ta ouma padaua ize poznac idzie takego utopca tysz po tym ize ze lewego rynkowa durch mu kapie woda. Taki utopiec ale poradzi sie przemiyniac, niykere widzieli go juz jak wyglondou choby normalny bajtel. 

   We Zernikach je jedyn stow kole kerego downiyj bajtle zawsze paśli kozy i krowy. Bajtle jak to bajtle, sam paśli krowy, sam ale niy na krowy obacht dowali ino paczeli gupieć i lotać za balom, abo co inkszego wynokwiać. Roz jak tak mieli szpas kole tego stowa to prziszou ku nim jedyn synek co go zodyn niyznou i zaczon ze nimi wynokwiać, a ze bou lepszy miglanc tak tysz oni go zaro do ferajny przjynli i zodnego niy szterowauo ize go niy znajom. We tyn dziyn bouo pieronym gorko, i tyn synek padou ize fajnie by bouo se we wodzie trocha potonkać. Bajtle ze Zernik ale padali ize niy mogom, bo im fatry niy kozali, i ze dyć woda we tym stowie je fest guymboko. Tyn synek na to syjmnou galoty a koszula i skoczou rajn do wody i zaczon puywac i skokac, i tysz stanou coby tym bajtlom pokozac ize tam wcale niyma guymboko, ino coby wlyz’li i sie niy boli, bo tam je tela wody ize ani niy poczebujom umieć puywać. No tosz jak to te bajtle uwidzieli to tysz sie zaro zaczli seblykać coby powskokiwać do wody. 

   Bez cufal ale szua we tym czasie jedna ouma kole nich i uwidziaua tego synka we stowie i poznaua ize to je utopiec i zaro padaua to tym bajtlom, kere prawie juz seblyczone chcieli skokać rajn do wody. Padaua im tysz co utopce robiom jak keregoś im sie udo rajn do wody wciongnonć. Woda w tym stowie boua naprowdy pieronym guymboko i tyn Utopiec jak merknou ize go poznali to ino zabulgotauo i schowou sie tyn pieron guymboko aze przi samym piosku, a bajtle gibko sie oblykli i polecieli do dom, ale zodyn sie niy prziznou mamie ize bou niy usuchliwy i chciou wlyś rajn do wody chociosz im fatry niy kozali. Dopiyro jak kupa lot minouo i te bajtle byli juz sroge i same juz mieli bajtli, to dopiero we tyn czas sie prziznali co to im sie przitrefiouo.